የቦርድ ሊቀመንበር መልዕክት

የተከበራችሁ የባንካችን ባለአክሲዮኖች፣

ዓባይ ባንክን የ2013 በጀት ዓመት ዓመታዊ አፈጻጸም ሪፖርት ሳቀርብላችሁ ታላቅ ደስታና ኩራት ይሰማኛል፡፡

ባሳለፍነው ዓመት የኮሮና ቫይረስን ሶስት ተከታታይ የወረርሽኝ ማዕበል ከማስተናገዱ ጋር ተያይዞ ዓለምአቀፍ ኢኮኖሚው ከፍተኛ አሉታዊ ተጽዕኖው የበረታበት ከመሆኑም ባሻገር በዓለምአቀፍ ደረጃ የተለየ አኗኗር እንዲለመድም ያስገደደ ሆኖ አልፏል፡፡ ወረርሽኙ የምንወዳቸውን በሞት በመንጠቅ፣ የስራ እንቅስቃሴን በመግታትና ማህበረሰብን እንዲሁም ቤተሰቦችን በመነጣጠልና ከግንኙነት በማቀብ ያደረሰውን ከባድ ጉዳት ተጋፍጠን ምንም እንኳን የስርጭት ሁኔታው ከሀገር ሀገር የተለያየ ቢሆንም ከክትባቱ መገኘትና መዳረስ ጋር ተያይዞ ዓለም በስተመጨረሻ ወረርሽኙ ከጣለባት ጨለማ እየወጣች እንደሆነ ይታያል፡፡ በወቅቱ ይፋ የተደረገው የዓለምአቀፉ የገንዘብ ተቋም (IMF) ሪፖርት ይህንን ከባድ ዓመት “አምሳያ የሌለው” ሲል የሰየመበት ሁኔታ በዓመቱ በወረርሽኙ ምክንያት የተስተናገደውን ከፍተኛ የቀውስ ደረጃ የሚናገር ነው፡፡

በሀገራችንም የታየው ችግር ከሞላ ጎደል በተመሳሳይነት ሊቀመጥ የሚችል ነው፡፡ በሀገራችን የሰሜኑ ክፍል የሕግ ማስከበርና የኅልውና ጦርነት ውስጥ ተጎትታ መግባቷ ከኮቪድ-19 አሉታዊ ተጽዕኖዎች ጋር ተዳምሮ ከፍተኛ የኢኮኖሚ መዳከምና የስራ እንቅስቃሴ መቀዛቀዝ አስከትሏል፡፡ ከእነዚህ ችግሮች ጋር በተያያዘ ለታየው አጠቃላይ የስራ እንቅስቃሴ መዳከም ኢኮኖሚው በተለይም ሆቴልና ቱሪዝም እንዲሁም የትራንስፖርት ዘርፎች በተለየ ሁኔታ መጎዳታቸው ይታወቃል፡፡

በበጀት ዓመቱ መገባደጃ ላይ ከወለድ-ነጻ የባንክ አገልግሎት ለመስጠት የተቋቋመ አንድ ተጨማሪ ባንክ ኢንዱስትሪውን የተቀላቀለ ሲሆን ይህም አጋጣሚ ከ20 በላይ የሚሆኑ ሌሎች በምስረታ ላይ የሚገኙና ከፊሎቹም የኢትዮጵያ ብሔራዊ ባንክን (ኢብባ) የስራ ፈቃድ በማግኘት ላይ ያሉ አዳዲስ ባንኮች የዘርፉን ተሳታፊዎች በዕጥፍ ለማሳደግ በመምጣት ላይ መሆናቸውን የሚጠቁም ነው፡፡ በኢብባ አዲስ ባንክ ለማቋቋም የሚጠየቀው ዝቅተኛው የካፒታል መጠንም በከፍተኛ ደረጃ ከፍ የተደረገው እንዲሁም መንግስት የሀገራችንን የመገበያያ ገንዘብ የመቀየር ስራም በስኬት ያጠናቀቀው በዚሁ የበጀት ዓመት ነበር፡፡ ይህ ሁኔታም ከባንክ ስርዓቱ ውጭ የነበረን ገንዘብ በባንኮች እንዲዘዋወር ከማድረጉም በላይ ለመንግስትም ብሔራዊ የፋይናንስ ደህንነትን ከመጠበቅ አኳያ መልካም አጋጣሚና አይነተኛ ሚና የነበረው ስራ ነበር፡፡

የባንካችን የበጀት ዓመቱ አፈጻጸም 10ውን ዓመት የምስረታ በዓሉን ባማረ ውጤት የታጀበ እንዲሆን አድርጎታል፡፡ የባንካችን አጠቃላይ አፈጻጸም በሚታወቁት መመዘኛዎች ሁሉ ሲታይ እጅግ አመርቂ ነበር፡፡ የተቀማጭ ገንዘብ ከማሰባሰብ አንጻር ባንኩ የ49በመቶ አጠቃላይ ዕድገት ያስመዘገበ ሲሆን አጠቃላይ ቁጠባውም ብር 23.9 ቢሊዮን ደርሷል፡፡ ከዚህም ጎን ለጎን የብድር መጠኑም አስደማሚ የሆነ የ72 በመቶ ዕድገት አስመዝግቧል፡፡ የባንካችን የደንበኞች ቁጥርም በዓመቱ በ46በመቶ አድጎ 1.2 ሚሊዮን ላይ ደርሷል፡፡ የቅርንጫፎቻችንንቁጥር በመላ ሀገሪቱ የማስፋፋት ሰፊ እንቅስቃሴ የተደረገ ሲሆን በዓመቱ 63 አዳዲስ ቅርንጫፎች ተከፍተው አጠቃላይ የአገልግሎት መዳረሻ ቅርንጫፎቻችንን ብዛትም 286 አድርሶታል፡፡ ከነዚህ ዋና ዋና እና በርካታ ሌሎች የስራ አንቅስቃሴዎች ጋር ተያይዞ ባንካችን በበጀት ዓመቱ የ80 በመቶዕድገት በማስመዝገብና ለመጀመሪያ ጊዜ የአንድ ቢሊዮን እርከንን በማለፍ ብር 1.15 ቢሊዮን ትርፍ አስመዝግቧል፡፡

በተጠቃለለው የበጀት ዓመት ለደንበኞቻችን የተሻለ አገልግሎት ለመስጠት የምናደርገውን ጥረት ትርጉም ባለው መልኩ እገዛ ያደረጉ በርካታ ጉልህ ተግባራት ተከናውነዋል፡፡ አዲስ የመዋቅር ጥናት ከማስጠናትና ከመተግበር አንጻር፤ የዋናውን ኮር ባንኪንግ ሲስተም በማዘመንና በማሻሻል፣ አዲስ የሰራተኞች የደሞዝ ስኬል በመተግበር፣ የባንኩን የወደፊት ዋና መስሪያ ቤት ሕንጻ ግንባታ ለመጀመር የሚያስችል ኮንትራት ከታዋቂ ሕንጻ ተቋራጭ ጋር ስምምነት መፈረሙ የሚጠቀሱ ናቸው፡፡ ዓመቱን ሙሉ የተከናወኑ እነዚህ የባንኩ ዘርፈ-ብዙ እንቅስቃሴዎች በጠንካራ የስጋት አስተዳደር እንዲሁም የኮምፕሊያንስ መልካም ተሞክሮዎችና አሰራሮች የተጠናከሩ ነበሩ፡፡ ከዚህም ጎን ለጎን ባንካችን የማሕበራዊ ኃላፊነቱን ከመወጣት አንጻር በበርካታ ሀገር አቀፍ እንቅስቃሴዎች እጁን በመዘርጋት ንቁ ተሳታፊ በመሆን ጉልህ ሚና ተጫውቷል፡፡

ዓመቱን አጠቃለን መጪውን ጊዜ ስንመለከት ለሀገራችን ሰላም በጋራ ለመስራት በመንቀሳቀስና በኮቪድ-19 የተደቀነብንን አደጋ በመዋጋትእንዲሁም ሌሎች ተግዳሮቶችን ተቋቁመን የዕድገት አቅጣጫችንን በማስጠበቅ እና በማጠናከር ለተሻለ ውጤት እንተጋለን፡፡ ሁሉንም ባለድርሻ አካላትና የባንኩን ማኅበረሰብ ከጎናችን በመያዝ የውስጥ ተቋማዊ ቁመናችንን በማጠናከርና የአፈጻጸም አቅማችንን በማጎልበት የባንካችንን የዕድገት መሪ ዕቅድ በማስቀጠል የላቀ ውጤት ለማስመዝገብ በቁርጠኝነት እንቀሳቀሳለን፡፡

በመጨረሻም የባንኩን የዳይሬክተሮች ቦርድ አባላት፣ ባለአክሲዮኖች እንዲሁም የስራ አመራር እና አጠቃላይ ሠራተኞች ላሳያችሁት ትጋትና ለተመዘገበው አስደሳች ውጤት እንኳን ደስ ያላችሁ ለማለት እወዳለሁ፡፡ በዚህ አጋጣሚም የባንክ ዘርፉን ወደተረጋጋና ምቹ የስራ ከባቢ ከመምራት አንጻር ለተወሰዱ አጠቃላይ እርምጃዎች የኢብባን ማመስገን እወዳለሁ፡፡ ለአጠቃላይ የንግዱ ማኅበረሰብ እንዲሁም ውድ ደንበኞቻችን አብራችሁን ስለሰራችሁና የተሻለ እንድናገለግላችሁ ስለረዳችሁን ልባዊ ምስጋናዬን አቀርባለሁ፡፡

 

አመሰግናለሁ!

ኢትዮጵያ ታደሰ

የዳይሬክተሮች ቦርድ ሊቀመንበር