የቦርድ ሊቀመንበር መልዕክት

የተከበራችሁ የባንካችን የአክሲዮን ባለቤቶች

ከሁሉ አስቀድሜ በዓባይ ባንክ የዳይሬክተሮች ቦርድ ስም እንኳን ለባንካችን 10ኛ ዓመት የምስረታ በዓል አደራሳችሁ በማለት የባንካችንን የ2012 ዓ.ም. ዓመታዊ ሪፖርት ሳቀርብ ላቅ ያለ ክብር ይሰማኛል፡፡

ይህ ዓመት ባንኩ ከተቋቋመበት ጀምሮ ለአለፉት አስር ዓመታት ያስመዘገበውን ስኬት የሚዘከርበትና በቀጣይ ዓመታት ለምንጠብቀው የላቀ አፈጻጸም የምንዘጋጅበት መሆኑን እየገለጽኩ፣በዚህ አጋጣሚ  ለተገኘው ስኬት ላደረጋችሁት አስተዋጾ ለማመስገን  እወዳለሁ፡፡

የአለፈው ዓመት  በኮረና ቫይረስ ምክንያት ስራ የተቀዛቀዘበት፣ በባንክ ኢንዱስትሪው ውስጥ ያለው ውድድር የጠነከረበት፣ በብዙ መልኩ በባንካችን ላይ ተጽኖ ያሳደሩ በርካታ ዓለምአቀፋዊና ሀገራዊ ክስተቶች የታዩበት ቢሆንም የባንካችን አፈጻጸም የሚያስመሰግንና የሚያበረታታ ነበር፡፡

ከዋና ዋናዎች ዉጤቶች ጥቂቶችን ለመጥቀስ ያህል አጠቃላይ ተቀማጭ ገንዘብ እና የአጠቃላይ የብድር መጠን እንደየቅደም ተከተላቸው ካለፈው ዓመት የ39 በመቶ እና የ52 በመቶ ዕድገት ማሳየት ችለዋል፡፡  በተመሳሳይ የባንኩ የተከፈለ ካፒታል የ30 በመቶ ዕድገት በማስመዝገብ ብር 2.2 ቢሊዮን የደረሰ እና ዕቅዱን ማሳካት የተቻለ ሲሆን ይህን ተከትሎም የባንኩ አጠቃላይ ካፒታል ካለፈው ዓመት የ26 በመቶ ዕድገት በማስመዝገብ ብር 3.1 ቢሊዮን ማድረስ ተችሏል፡፡ በዓመቱ ውስጥ የባንኩ አጠቃላይ ገቢ ከቀዳሚው ዓመት ጋር ሲነጻጸር የ14 በመቶ ዕድገት ያስመዘገበ ሲሆን የዓመቱ ከግብር በፊት የተገኘ ትርፍ ብር 640 ሚሊዮን ደርሷል፡፡

በተጠናቀቀው በጀት ዓመት በባንኩ እና በባለድርሻ አካላት የተቀናጀ ጥረት በአዲስ አበባ ከተማ ከባንኩ ይዞታ አዋሳኝ የሆነ ተጨማሪ ቦታ በይዞታችን ውስጥ ማካተት በመቻላችን የባንኩን ራዕይ የሚመጥን እና አርአያ የሚሆንየ ዋናው መስርያ ቤት ህንጻ ለመገንባት የሚያበቃን ሰፊይ ዞታ ማግኘት ችለናል፡፡

ይህን ተከትሎም የዋናው መስሪያ ቤት የቀድሞ ዲዛይን የመከለስ እና በመጠንም ሆነ በጥራት የማሳደግ ስራ በመከናወን ላይ ይገኛል፡፡ በሌላ በኩል ባንኩ ንብረት ማፍራት የሚያስችሉትን አማራጮችን በማስፋት የአዋጭነት ጥናት በማድረግ በተለያዩ ቦታዎች ላይ የህንጻ ግዥ ማከናወንን እንደ አንድ አማራጭ የያዘ ሲሆን በዚህም መሰረት በጎንደር ከተማ ከባንክ በተጨማሪ ለሌሎች አገልግሎቶች መዋል የሚችል “ቋራ ሆቴል” ተብሎ የሚጠራውን ህንጻ ግዢ ፈጽመናል፡፡

የባንኩን ዘላቂ ዕድገት እና ትርፋማነት ከማስቀጠል አንጻር ቦርዱ በደንበኞች እርካታ፣ በቴክኖሎጂ ማዘመን እና በአሰራር ውጤታማነት ላይ ትርጉም ያለው ለውጥ ማስመዝገብ የሚያስችሉ ውሳኔዎችን በማሳለፍ አመራር እየሰጠ ይገኛል፡ በተጨማሪም ትጉ እና የተነቃቃ የሰው ሃይል መፍጠር እና ብቁ የሪስክ አስተዳደር ስርዓት መዘርጋት የባንኩን ዕድገት እና ውጤታማነት በማስቀጠል ወደ ራዕዩ ከሚያደርሱት ዋነኛ የትኩረት ማዕከሎች ናቸው፡፡

በዚህም መሰረት የባንኩ የአምስት ዓመት የስትራቴጂክ ዕቅድ የተከለሰ ሲሆን ይህን ተከትሎም የባንኩ መዋቅር እንዲሻሻል ተደርጓል፡፡ ከዚህም ባሻገር ዘመናዊ የባንክ አገልግሎቶችን ተደራሽነትና አስተማማኝነት ከመቼውም ጊዜ በተሻለ ሁኔታ ማረጋገጥ የሚስችል ነባሩን የኮር-ባንኪንግ ሶፍትዌር ዓለም ወደ ደረሰበት ደረጃ በማዘመን በስራ ላይ አውሏል፡፡ ይህን ተከትሎም የዲጂታል አገልግሎቶችን የሚያቀርብበትን መተግበሪያም ይበልጥ ማዘመን እና አስተማማኝ ማድረግ ተችሏል፡፡

ይህ በእንዲህ እንዳለ የሪስክ አስተዳደሩን እና የውስጥ ቁጥጥሩን ዓቅም ለማጠናከር የሚያስችሉ የሪስክ አስተዳደር እና የውስጥ ቁጥጥር መመሪያና ስርዓቶችን የማዘመንና አሻሽሎ ተግባራዊ የማድረግ ስራዎችን በመስራት አጥጋቢ ውጤትም ተመዝግቧል፡፡

ባንካችን ገንዘብ ነክ በሆኑና ባልሆኑ መመዘኛዎች አበረታች  ያስመዘገበ ሲሆን ለዚህ ደግሞ መሰረቱ ከፍተኛ የሆነና የተረጋጋ የገቢ እና የካፒታል መጠን ማስመዝገቡ ነው፡፡ እንደ ከዚህ ቀደሙ ባንኩን በከፍተኛ ደረጃ የማሳደግ ጥረቱ እና የባለአክሲዮኖቹን ዘላቂ ጥቅም የማረጋገጥ ስራውን አጠናቅሮ  እንደሚሄድ የባንኩ የቦርድ አመራር ያረጋግጣል፡፡ ይህንንም ለማሳካት የባንኩን የስትራቴጂክ ዕቅድ  የአጋማሽ ዓመት አፈጻጸም ግምገማ ወቅት የተደረሰባቸውን ምክረ-ሃሳቦች መሰረት አድርጎ በመንቀሳቀስ የባንኩን አስተዳደር፣ ተቋማዊ አቅም፣ የሪስክ አስተዳደር ማእቀፍ እና የውስጥ ቁጥጥር ለማጠናከር ይሰራል፡፡

በተያዘው ዓመት የባንኩ የቦርድ፣ የስራ አመራር አባላትና ሰራተኞች በተቀናጀ መልኩ በመንቀሳቀስ አዳዲስ ዕድሎችን ለመጠቀምና የገበያ ድርሻችንን ለማስፋት ይቻለን ዘንድ የአሰራር ብቃታችንንና ፈጠራችንን ቀጣይነት ባለው መልኩ እናሳድጋለን፡፡ በተጨማሪም የደንበኞቻችንን ቁጥር ከማሳደግ እና የሃብት ማሰባሰብ ስራችንን በስፋት ከማከናወን ባለፈ የዋና መስሪያ ቤት እና የዲስትሪክት ጽህፈት ቤቶች ግንባታ በትኩረት የምናከናውናቸው ተግባራት ይሆናሉ፡፡

በመጨረሻም በራሴና በባንኩ የዳይሬክተሮች ቦርድ አባላት ስም ይህ አመርቂ ውጤት እንዲመዘገብ ከፍተኛውን ድርሻ ለተወጡት የባንኩ አመራር አባላትና ሰራተኞች፣ እንዲሁም ያልተቋረጠ ድጋፍ እና ክትትላቸው ላልተለየን ለባንኩ ባለአክሲዮኖች፣ ለኢትዮጵያ ብሔራዊ ባንክ፣ ሌሎች ባለድርሻ አካላት እንዲሁም ለክቡራን ደንበኞቻችን ልባዊ ምስጋናዬን እና አድናቆቴን ለመግለጽ እወዳለሁ፡፡

አመሰግናለሁ!

ኢትዮጲያ ታደሰ

የዳይሬክተሮች ቦርድ ሰብሳቢ