የዋና ሥራ አስፈጻሚ መልዕክት

የተከበራችሁ የባንካችን የአክሲዮን ባለቤቶች

የባንካችንን የ2012 ዓ.ም. ጥቅል ዓመታዊ አፈጻጸም ሳቀርብ ከፍተኛ ክብር ይሰማኛል፡፡

ያሳለፍነው ዓመት በሃገራችን እየተካሄዱ የሚገኙት የማህበራዊና ኢኮኖሚያዊ ማሻሻያዎች እየፈጠሩ ያሉት ዕድል በአንድ በኩል፤ አለምአቀፋዊ የጤና እና የኢኮኖሚ ጫና የፈጠረው የኮሮና ቫይረስ ወረርሽኝ እና በአንዳንድ የሃገሪቱ አካባቢዎች ተከስተው የነበሩ ግጭቶች በሌላኛው ጎን በባንክ ኢንዱስትሪውም ሆነ በባንካችን ላይ በጎም ሆነ በጎ ያልሆኑ ተጽዕኖዎች መካከል ተጠቃሽ ናቸው፡፡ በተጨማሪም የውጭ ምንዛሪ ዕጥረት መባባስ፣ በባንኮች መካከል የውድድር መጨመር፤ ከፍተኛ የሆነ የዋጋ ግሽበት እና የገበያ መቀዛቀዝ በዋናነት የሚጠቀሱ ኢኮኖሚያዊ ተግዳሮቶች ነበሩ፡፡

ምንም እንኳን ከላይ የተዘረዘሩት ፈታኝ ሁኔታዎች ጫና የፈጠሩብን ቢሆንም ባንካችን እነዚህን ውስብስብ ፈተናዎች በመሻገር አመርቂ ውጤት ለማስመዝገብ በቅቷል፡፡ ባንካችን ካስመዘገባቸው ውጤቶች መካከል የተወሰኑት ለመጥቀስ ያህል፣ የአጠቃላይ ብድር መጠን ከቀደመው ዓመት ጋር ሲነጻጸር የ52 በመቶ ዕድገት ሲያስመዘግብ፤ የአጠቃላይ ተቀማጭ ገንዘብ መጠን የ39 በመቶ በማስመዝገብ አጠቃላይ የብድር ስርጭቱን ብር 11.8 ቢሊዮን፣ የተቀማጭ ገንዘብ መጠንን ብር 16.1 ቢሊዮን ማድረስ የተቻለ ሲሆን ዓመታዊ ገቢያችን የ14 በመቶ ዕድገት በማስመዝገብ ብር 2.1 ቢሊዮን ደርሷል፡፡ በሌላ በኩል የባንኩ አጠቃላይ ካፒታል በ26 በመቶ ዕድገት ብር 3.1 ቢሊዮን ሲደርስ ጠቅላላ ሃብቱ ከተነጻጻሪው ዓመት የ34 በመቶ ዕድገት አስመዝግቦ ብር 20.2 ቢሊዮን ደርሷል፡

በተጨማሪም ተደራሽነቱን ለማስፋት የሚያስችሉትን የዘመኑ የባንክ አገልግሎት መስጫዎችንና አዳዲስ ቅርንጫፎችን ቁጥር ከማብዛት አንጻር በተለያዩ ከተሞች 31 አዳዲስ ቅርንጫፎችን በመክፈት አጠቃላይ የባንኩን ቅርንጫፎች ቁጥር 223 ማድረስ የተቻለ ሲሆን ዘመናዊ የባንክ አገልግሎት መስጫዎችን ከማበራከት አንጻር ተጨማሪ 16 የዓባይ በደጄ ወኪሎችን በማፍራት በ298 ወኪሎቻችን በኩል የባንክ አገልግሎት ለመስጠት ተችሏል፡፡ በተመሳሳይ መልኩ እስከ ተገባደደው የበጀት ዓመት መጨረሻ ባንኩ የኢንተርኔት፣ የሞባይል እና የኤቲኤም ካርድ ተጠቃሚዎችን ቁጥር እንደቅደም ተከተላቸው 3,964፣164,177 እና 167,674 ማድረስ ችለናል፡፡ በእነኝህ የአገልግሎት መዳረሻዎቻች በኩል የሚገለገሉ አጠቃላይ ደንበኞቻችን ቁጥር ካለፈው ዓመት የ32 በመቶ ዕድገት በማስመዝገብ ከ824,000 በላይ ማድረስ ተችሏል፡፡

በመጨረሻም ለዚህ ውጤት መገኘት ያልተቆጠበ ጥረት ላበረከቱት የስራ ባልደረቦቼና መላው የባንኩ ሰራተኞች፣ ለክቡራን ደንበኞቻችን፣ የባንኩ ባለአክሲዮኖች፣ ለኢትዮጵያ ብሔራዊ ባንክና ሌሎች ባለድርሻ አካላት ከጎናችን በመሆን ላበረከቱት ያልተቆጠበ ድጋፍ እንዲሁም የዳይሬክተሮች ቦርድ አባላት ላበረከቱት የቅርብ አመራር ከልብ የመነጨ ምስጋናዬን እያቀረብኩ የእናንተ ድጋፍ ባይታከልበት ኖሮ ይህን ውጤት ማስመዝገብ የማይታሰብ በመሆኑ የተለየ አድናቆቴን በዚህ አጋጣሚ ለመግለጽ እወዳለሁ፡፡

አመሰግናለሁ

የኋላ ገሠሠ                                                                                         

ዋና ስራ አስፈጻሚ